Autoritetet në Kroaci kanë shqiptuar masën e paraburgimit për dy të dyshuarit për spiunazh për Serbinë. Piloti i forcave kroate që shërbente në kuadër të misionit të KFOR-it në Kosovë dhe partnerja e tij serbe nga Mitrovica e Veriut u ndaluan në paraburgim pasi gjykata konsideron se ekziston rreziku i arratisjes dhe ndikimit mbi dëshmitarët. Ndërkohë, Prokuroria e Qarkut në Split njoftoi se ka nisur hetimet pas kallëzimit penal të policisë ushtarake. Mediat kroate raportojnë se e dyshuara Ana Murganic ka marrë informacione nga partneri i saj pilot që shërbente në KFOR dhe ia ka transmetuar Listës Serbe, partisë më të madhe serbe në Kosovë. Po ashtu raportohet se Murganic ka kontaktuar edhe me Vladimir Radivojevic i njohur me nofkën “Mami” e i dyshuar për sulmin terrorist në Banjska në shtator të vitit 2023. Sipas mediave në Kroaci, “Mami” njihej që nga fëmijëria me Murganic dhe kishin komunikuar me mesazhe edhe për sulmin e 25 shtatorit të vitit 2022 ndaj KFOR-it në Zubin Potok. "Duhet ta ‘hekurosni’ sulmin ndaj KFOR-it me çdo kusht”, raportohet t’i ketë shkruar Murganic, Radivojevicit. Derisa, po atë ditë i dashuri i saj, piloti kroat, i dërgoi një mesazh serbes duke thënë: “Vërtetë e prishët punën mbrëmë”. Vladimir Radivojevic “Mami” është anëtar i “Brigadës së Veriut” organizatë kjo e shpallur terroriste nga qeveria e Kosovës e po ashtu ka të ngritur aktakuzë për sulmin terrorist të Banjskës. Qeveria e Kosovës ka shprehur gatishmërinë të bashkëpunojë me autoritetet kroate, për shkak se veprimtaria kriminale është zhvilluar në Kosovë, tha Përparim Kryeziu, zëdhënës i ekzekutivit.