Integrimi i Ballkanit Perëndimor, përfshirë edhe Kosovën, ishte fokusi i takimit të ministres së Jashtme, Elisa Spiropali, me kryediplomaten e Bashkimit Evropian, Kaja Kallas. Në takimin me Kallas, në Bruksel, ministrja Spiropali tha Shqipëria do vijojë angazhimin si faktor i sigurisë rajonale, përfshirë mbështetjen për Ukrainën. “Në takimin me Kallas, theksova bindjen e plotë se integrimi i Ballkanit Perëndimor në BE, përfshirë Kosovën, është një investim strategjik për të ardhmen e përbashkët nën qiellin europian". Nga ana e saj, Kryediplomatja Kallas vlerësoi Shqipërinë për linjëzimin e plotë me politikat e jashtme të BE dhe për seriozitetin me të cilin vendi ynë është angazhuar në procesin e negociatave. Më herët gjatë ditës, ministrja e Jashtme u takua dhe me komisioneren për Zgjerim të Bashkimit Evropian, Marta Kos, ku kjo e fundit tha se unioni mbështet Shqipërinë për mbylljen e negociatave brenda vitit 2027.