Aleksandar Vucic i mohoi me forcë pretendimet që e lidhin atë me skandalin e të ashtequajturve “snajperë të fundjavës” në Sarajevë gjatë luftës në Bosnje e Hercegovinë në vitet ’90. “Unë kurrë nuk kam mbajtur një pushkë në dorë”, deklaroi Vucic për TV Informer, tkesa shtoi se do të ngrejë padi kundër mediave që kanë publikuar lajmin dhe se do të angazhojë “avokatët më të mirë në botë”. Gazetari investigative kroat Domagoj Margetic deklaroi më herët se i kishte dorëzuar Prokurorisë në Milano – e cila po udhëheq hetimin për “safarin e snajperëve”, dokumente që dëshmojnë se Vucic ka marrë pjesë ose ka ndihmuar në “turizmin e vdekjes”, ku thuhet se të huaj të pasur paguanin forcat serbe rreth Sarajevës së rrethuar për të shtënë ndaj civilëve të qytetit. Vuçic insistoi në intervistën për TV Informer, se“nuk kishte dëgjuar kurrë për një fundjavë” të tillë. “Por, kjo s’ka rëndësi. Unë nuk kam pasur pushkë; madje kur kam ardhur dhe kam pyetur nëse mund të jem me ju, më thanë ‘djalosh, kthehu, na duhet gazetar dikush që di anglisht’. Historia është aq absurde dhe këtë e dinë të gjithë; kam incizime, dëshmitarë, dhe aty ku thonë se ishte pushka, në fakt ishte tripodi mbajtës i kamerës se po ndihmoja kameramanin”, tha ai. Vucic shtoi se beson që me paditë që do të ngrejë ndaj mediave si The Guardian, Daily Mail dhe të tjera që kanë raportuar për këtë, mund të fitojë miliona euro.