Pas akuzave për keqtrajtim të rëndë të të moshuarve në një azil pleqsh pranë Bukureshtit, ministrja e Familjes, Rinisë dhe Shanseve të Barabarta, Gabriela Firea dha dorëheqjen me kërkesë të kryeministrit Marcel Ciolacu. Firea njoftoi largimin e saj në Facebook, pas dorëheqjes për të njëjtin skandal të ministrit të Punës, Marius-Constantin Budai. Dy ministrat e shkarkuar janë anëtarë të Partisë Socialdemokrate Ministrja Fiera u sulmua pasi menaxheri i kompleksit të azileve në periferi të Bukureshtit, Voluntari, i cili që atëherë është arrestuar, kishte qenë një ish-punonjës i saj. ”Përveç kësaj, bashkëshorti i Fireas, i cili është kryetar i bashkisë së Voluntarit, ka mbuluar menaxherin e azileve”, raportojnë mediet. Friea ka mohuar të gjitha akuzat, por Prokuroria Publike ka mbi një javë që ka hetuar këtë çështje. Gjatë një kontrolli, 98 banorë u dërguan në spitale, me disa me plagë të hapura. ”Ata ishin trajtuar në mënyrë çnjerëzore thanë autoritetet. Të moshuarit detyroheshin të punonin pa pagesë dhe nuk kishin marrë ushqimin dhe mjekimin që u takonte”, tha zyra e prokurorit publik. Ekspertët e mjekësisë ligjore tani po shqyrtojnë nëse edhe ata janë rrahur dhe nëse u janë dhënë doza të tepërta qetësuesish. Për shkak të plakjes së popullsisë në Rumani, biznesi i azileve po lulëzon. Mësohet se dhjetëra azile funksionojnë pa leje, sipas inspektimeve të urdhëruara nga qeveria në të gjithë vendin në përgjigje të skandalit në Voluntari. Pamjet: AFP