Presidentja e Kosovës, Vjosa Osmani të enjten është përballur me një situatë të paprecedentë në Aeroportin e Shkupit kur po bëhej gati për një udhëtim. Sipas zyrës së saj, një zyrtar në këtë aeroport ka tentuar t’ia marrë telefonin Osmanit, e cila nuk ka lejuar një gjë të tillë e më pas zyrtari ka tentuar fizikisht ta shtyjë presidenten e Kosovës. “Në kundërshtim me praktikat ndërkombëtare dhe Konventën e Vjenës për Marrëdhënie Diplomatike, sigurimi i Aeroportit të Shkupit ka tentuar ta marrë telefonin personal të Presidentes. Presidentja nuk ka lejuar një gjë të tillë, sepse do të ishte shkelje e rëndë. Përkundër shpjegimit të rregullave qe ekipi i Presidentes ia ka bërë të ditur zyrtarit të aeroportit, ai ka tentuar fizikisht ta shtyjë Presidenten me ç’rast është detyruar që të reagojë Policia e Kosovës për ta hapur rrugën”, thuhet në sqarimin nga Zyra e Presidentes së Kosovës. Më pas është bërë e ditur po ashtu që pala maqedonase ka marrë edhe çantën personale të presidentes. “Në kundërshtim me këto rregulla, pala maqedonase ka marrë çantën personale të dorës së presidentes. Edhe pse kjo ishte kundër rregullave, ekipi i Presidentes e ka lejuar në mënyrë që Presidentja të hyjë në aeroport, konkretisht në sallën VIP, e cila ishte rezervuar me notë verbale të Ambasadës sonë, siç është praktika për udhëtimet e krerëve të shtetit. Mirëpo, për arsye të sigurisë, në asnjë mënyrë nuk është lejuar që të dorëzohet telefoni personal”, njoftohet më tej. Presidenca e Kosovës e cilëson sjelljen e zyrtarit maqedonas si arrogante dhe të dhunshme e në kundërshtim me praktikat ndërkombëtare që lejojnë krerët e shteteve që gjatë udhëtimeve të mbrohen me privilegje dhe imunitete diplomatike. “Vërehet qartë se në rastin në fjalë kishte tendencë për ta provokuar delegacionin e Republikës së Kosovës dhe për të shkaktuar incident. Presidentja e ka njoftuar për këtë skandal diplomatik të shkaktuar nga pala maqedonase kryetarin e Kuvendit z.Afrim Gashi, të cilin e falënderon për ndihmën e ofruar”, sqarohet tutje nga Presidenca përmes këshilltarit për media, Bekim Kupina. Përpos incidentit për telefonin, Kabineti i Presidentes ka bërë të ditur se edhe pas hyrjes së Presidentes në aeroplan, Aeroporti i Shkupit nuk e ka lejuar nisje për më shume se një orë. “Presidenca e konsideron çdo sulm dhe trajtim të parregullt e në kundërshtim me konventat ndërkombëtare të zyrtarëve të lartë shtetëror si sulm ndaj vete shtetit të Kosovës. Republika e Kosovës, asnjëherë në historinë e saj, nuk ka trajtuar në mënyrë të tillë Presidentin/Presidenten, Kryeministrin apo Ministrat e Maqedonisë së Veriut e as të ndonjë vendi tjetër e as nuk do të lejojë një ndonjëherë një gjë të tillë”, përfundon sqarimi i Presidencës lidhur me incidentin.