Kandidatët Joe Biden dhe Donald Trump po përdorin inteligjencën artificiale për të tërhequr votuesit në fushatën presidenciale të këtij viti në Shtetet e Bashkuara. Ky është një nga ndryshimet më të mëdha në mënyrën se si ekipet e fushatave të kandidatëve po komunikojnë një pjesë të votuesve amerikanë, raporton Zëri i Amerikës. Për ekipet e fushatave të kandidatëve mënyra më ekonomike për komunikimin me më shumë votues është përmes përdorimit të inteligjencës artificiale, një nga ndryshimet më të mëdha në politikën amerikane këtë vit. Modelet po përmirësohen shumë shpejt, thonë analistët dhe janë mjete të fuqishme për ekipet e fushatave në nivel kombëtar dhe në atë lokal. “Inteligjenca artificiale mund të luajë një rol të madh në fushatën e një kandidati që garon ndaj një rivali me përvojë dhe gjendje shumë më të mirë financiare”, shpjegon analistja politike Betsy Hoover, firma e së cilës, investon në zhvillimin e teknologjisë për Partinë Demokrate dhe kauzat e majta. Ajo thekson se shfrytëzimi “në mënyrën e duhur” i teknologjisë është shumë i rëndësishëm. Në vitin 2016, Trump përdori reklama në mediat sociale me mesazhe të krijuara veçmas për secilin votues në çdo shtet, duke punuar me firmën britanike të mbledhjes dhe përpunimit të të dhënave, “Cambridge Analytica”.