Një gjë e pazakontë ndodhi këtë të shtunë në Serbi. Sipas mediave serbe, një ekran elektrik në qytetin e Valevës ka shfaqur një imazh teksa shihet një shqiponjë me dy krerë me plis në kokë që ka “kapur për fyti” një shqiponjë që ka në prapavijë flamurin e Serbisë. Fotografia është publikuar në Instagram nga faqja “valjevo_live”. “Në qendër të qytetit është shfaqur ky billboard. Besohet se është hakuar dhe konsiderohet si një provokim”, thuhej në postim. Ndërkohë, një person që pretendon të jetë pronar i billboardit, pra ekranit elektrik, ka reaguar në komentet e postimit. “Jam pronari i billboardit që është hakuar mbrëmë. E fikëm menjëherë sapo e kuptova, dhe rasti do të raportohet tek autoritetet përkatëse”, ka shkruar ai. Ende nuk ka asnjë deklaratë zyrtare mbi atë që ka ndodhur. Kjo foto u bë virale në vitin 2014 pas ndeshjes së famshme Serbi-Shqipëri.