Ministri i Mbrojtjes Pirro Vengu e zhvilloi në Kosovën në vizitën e tij të parë zyrtare jashtë vendit që prej marrjes së postit. Ai takoi kryeministrin Albin Kurti, për një bisedë gjatë së cilës theksi u vendos tek forcimi i bashkëpunimit në rrafshin e Mbrojtjes, stabiliteti rajonal dhe ndërveprimi i domosdoshëm me aleatët për një konsolidim të Kosovës në rrafshin ndërkombëtar. “Sot në Kosovë për të folur për ato ura që na lidhin, e të tjera që duhet të shtojmë në rrugëtimin tonë të përbashkët. Në takimin tejet të hapur e miqësor me Kryeministrin Kurti folëm për investimet e përbashkëta në mjete dhe kapital njerëzor, janë një kontribut në sigurinë kolektive”, shkroi ministri në një postim pas takimit. Më tej, ai zhvilloi një takim me homologun e tij Ejup Maqendonci, në të cilin vlerësoi bashkëpunimin e shkëlqyer dhe vëllazëror midis dy vendeve, sic e e përshkroi ai, dhe si një element strategjik, stabilizues për rajonin dhe orientues për perspektivën euroatlantike.