Ministria e brendshme maqedonas konfirmoi arratisjen nga arresti shtëpiak i Blerim Ramadanit, ish-pjesëtar i Ushtrisë Çlirimtare të Kosovës, i cili ishte ndaluar nga autoritetet policore maqedonase në bazë të një urdhër-arresti të lëshuar nga Serbia. Tashmë, sipas të njëjtës ministri, në emër të tij do të lëshohet dhe një fletë arresti qendrore. Autoritetet nuk kanë dhënë detaje mbi arratisjen e shtetasit të Kosovës, por një portal në gjuhën maqedonase pretendon se ai është larguar nga shtëpia e miqve të tij në Shkup, ku qëndronte nën arrest shtëpie në bazë të një urdhri të gjykatës themelore në Shkup. Sipas portalit sdk.mk, pas ankesës së Prokurorisë, tre gjykatës të Gjykatës Penale i kishin caktuar Ramadanit masën e paraburgimit efektiv prej 30 ditësh për shkak të rrezikut se mund të arratisej. Gjithnjë sipas portalit, dikush nga Gjykata Penale e ka njoftuar Ramadani i cili pas kësaj është larguar. Javën e kaluar ministria e Jashtme e Kosovës pohoi se një gjykatë në Shkup kishte vendosur që Ramadani të mos dorëzohej tek autoritetet serbe zotin Ramadani, por të vazhdonte të mbahej në arrest shtëpie në Shkup deri në vendimin përfundimtar të Gjykatës së Lartë të Maqedonisë së Veriut. Arrestimi i tij kishte ndodhur në fund të korrikut në vendkalimin kufitar ndërmjet Kosovës dhe Maqedonisë së Veriut, pranë Tetovës. Ish pjesetarët e UÇK-së nga Ferizaji, ku dhe Ramadani bënte pjesë i cilësuan aktakuzat e autoriteteve të Serbisë si të fabrikuara dhe arrestimet “të padrejta dhe shqetësuese për të gjithë veteranët”.