Komentet për raketën balistike iraniane që u rrëzua nga sisteme të NATO-s në Mesdheun Lindor “japin e marrin” në shtypin grek orët e fundit , sidomos pas deklaratës së një funksionari turk se objektivi ishte Qiproja. Sipas tij raketa balistike iraniane që u neutralizua të mërkurën nuk kishte në shënjestër Turqinë, por një bazë ushtarake në Qipro, dhe se devijoi nga trajektorja . Në të njëjtin kontekst, autoritetet greke konfirmojnë se dy prej 4 avionëve luftarakë F16 që operojnë tashmë në Qipro u ngritën në ajër pas sinjalizimeve për të neutralizuar “objekt të dyshimtë”, por nuk u verifikua përfundimisht prania e ndonjë droni iranian pranë kufijve ajrorë të Qipros. Të gjitha këto zhvillime ,bashkë me ato të ditëve të fundit u reflektuan edhe seanëcn plenare të parlamentit grek , ku ka pasur përplasje dhe qasje të ndryshme për kufijtë e përfshirjes së Greqisë në krizën e Lindjes së Mesme, rolin e bazave dhe mbështetjen ushtarake ndaj Qipros. Qeveria dhe kryeministri Mitsotakis e paraqitën linjën e tyre si një “dogmë e re mbrojtëse”: me praninë dhe gatishmërinë aty ku e kërkon detyrimi kombëtar, me prioritet sigurinë e qytetarëve grekë, lirinë e transportit detar, thirrje për uljen e tensioneve dhe diplomaci, duke theksuar se Qiproja është më pranë zonës së luftës dhe kërkon mbrojtje të shtuar. Nga ana tjetër socialistët e Pasok-ut , kërkuan që Greqia të mbetet faktor stabiliteti dhe refuzuan çdo përfshirje në operacionet e SHBA me Izraelin. Νdërsa edhe partitë e tjera të opozitës akuzojnë qeverinë për rrëshqitje në një konflikt me pasoja të paparashikueshme. Në terren, zhvillimi i fundit është mbërritja e sistemit të raktave Patriot në Karpathos – një prej ishujve prej të cilëve Turqia në të kaluarën ka kërkuar çmilitarizim, por që në këtë rast nuk shoqërohet me reagim publik prej saj, as për raketat dhe as për ndihmën ushtarake që Greqia pas dekadash i ka dhënë tashmë Qipros me 4 avionë F16 dhe dy prej fregatave me moderne ne botë.