Zgjedhjet presidenciale në Shtetet e Bashkuara të Amerikës mbahen në 5 nëntor, megjithatë se cili do të jetë kreu i ri Shtëpisë së Bardhë, kjo nuk do të mësohet dot menjëherë. Në fakt, sipas mediave në SHBA, mund të duhen disa ditë përpara se të zbardhet plotësisht rezultati i garës së ngushtë mes demokrates Kamala Harris dhe republikanit Donald Trump, pas mbylljes së qendrave të votimit. Ato shpjegojne se teksa numërohen votat, një kandidat mund të duket se kryeson bazuar në të dhënat e para, por më pas ekziston mundësia që rezultati të ndryshojë me numërimin e votave të tjera. Kjo ndodhi në vitin 2020 kur në disa shtete Trump kaloi në epërsi natën e zgjedhjeve, përpara se rezultati të përmbysej nga kandidati demokrat Joe Biden, një fenomen ky që republikani e përdori për pretendimet e tij të rreme se zgjedhjet ishin vjedhur.