Bisedimet mes Shteteve të Bashkuara dhe Rusisë që po zhvillohen në Riad të Arabisë Saudite, për luftën në Ukrainë, nuk do të çojnë në nënshkrimin e dokumenteve të rëndësishme, ka njoftuar zëdhënësi i Kremlinit, Dmitry Peskov. Pas 12 orësh diskutimesh, Peskov theksoi se nuk priten marrëveshje konkrete, por përfundimet mund të shpallen të martën, 25 mars. Këto bisedime vijnë në një periudhë ku Lufta në Ukrainë ka hyrë në ditën e saj të 1125. Presidenti amerikan Donald Trump ka deklaruar se Shtetet e Bashkuara dhe Rusia po negociojnë për linjat e demarkacionit territorial dhe çështjen e menaxhimit mbi termocentralin bërthamor të Zaporizhias, një objekt kyç që ka qenë në qendër të tensioneve. Trump theksoi se negociatat kanë për qëllim të gjejnë një zgjidhje për këtë konflikt, i cili ka shkaktuar mijëra viktima dhe ka destabilizuar rajonin. Ndërkohë, Shtëpia e Bardhë ka shprehur angazhimin e saj për të arritur një marrëveshje armëpushimi midis Ukrainës dhe Rusisë deri më 20 prill, që përkon me Pashkët, si për Kishën Katolike, ashtu edhe për Kishën Ortodokse. Duke komentuar për bisedimet, Kremlini ka theksuar se ka një vullnet për të arritur një zgjidhje paqësore, por se ende ka shumë aspekte të diskutueshme që duhet të zgjidhen, veçanërisht në lidhje me objektet energjetike, përfshirë termocentralet bërthamore. Për situatën ka reaguar edhe qeveria kineze, që ka mohuar lajmet mbi dërgimin e trupave të saj për të marrë pjesë në një operacion paqeruajtës në Ukrainë. Zëdhënësi i Ministrisë së Jashtme të Kinës, ka quajtur këto raporte “krejtësisht të rreme”.