Puna e bërë në luftën kundër krimit dhe korrupsionit nga ana e SPAK deri më tani është vlerësuar nga Shtetet e Bashkuara të Amerikës. I ngarkuari me Punë në Ambasadën amerikane në Tiranë, David Wisner gjatë një takimi që zhvilloi këtë të enjte me kryeprokurorin Altin Dumani I përcolli këtij të fundit edhe njëherë mesazhin se Prokuroria e Posaçme gëzon mbështetjen e plotë të SHBA dhe se duhet të vijojë misionin e saj për të arrestuar të gjithë kriminelët dhe personat e korruptuar. “Puna e SPAK dhe të tjerëve në sektorin e drejtësisë kërkon guxim, integritet dhe pasion të jashtëzakonshëm. Z. Wisner përcolli vlerësimin e Shteteve të Bashkuara për punën e SPAK, duke theksuar se ai ka mbështetjen tonë të plotë për të kryer misionin e tij në emër të popullit shqiptar.”, thuhet në njoftimin e ambasadës amerikane.