Njoftimi i qeverisë së Republikës serbe se do të hartojë brenda 30 ditësh një marrëveshje për ndarje paqësore e cila do t’i dërgohet më pas entitetit tjetër të Bosnjës, Federatës së Bosnje Hercegovinës, është kritikuar nga Shtetet e Bashkuara. Në reagimin e ambasadës së Shteteve të Bashkuara në Bosnje, thuhet se kjo nënkupton shkëputjen e Republikës Serbe, duke e cilësuar si “një veprim të rrezikshëm, të papërgjegjshëm, anti Dejton dhe që vë në rrezik tërësinë tokësore, sovranitetin dhe karakterin shumetnik të Bosnjës dhe Hercegovinës. Këto janë interesa thelbësore amerikane. Shtetet e Bashkuara do t'i mbrojnë ato, ndër të tjera, duke kërkuar përgjegjësi nga ata që i vënë në rrezik”. Në reagimin e ambasadës së SHBA-ve, thuhet mes të tjerash se Kushtetuta e Bosnjës nuk u jep të drejtën e shkëputjes njësive të saj përbërëse. “Republika Serbe mund të ekzistojë vetëm brenda Bosnjës dhe Hercegovinës. Shkëputja ose ‘ndarja’ e Republikës Serbe nuk do të thotë pavarësi për të ose fund për Bosnjën, por fund për Republikën Serbe”, thuhet në reagim. Po ashtu ndër të tjera theksohet se deklaratat e zotit Dodik vënë në rrezik edhe të ardhmen euroatlantike që dëshirojnë qytetarët e Bosnjës. Kujtojmë që presidenti i Republikës Serbe, Milorad Dodik dhe disa zyrtarë të tjerë serbë të Bosnjës janë nën sanksionet e Shteteve të Bashkuara dhe Britanisë, pjesërisht për rrezikimin e një marrëveshjeje të paqes të mbështetur nga Shtetet e Bashkuara, që i dha fund luftës në Bosnje e cila la pas vetes mbi 100 mijë te vrarë dhe miliona të zhvendosur. Pamejt: AFP