Fati i TikTok-ut në SHBA mun d të qartësohet brenda një muaji: Presidenti Donald Trump është angazhuar në bisedime me shumë individë për blerjen e platformës së njohur, dhe besohet se në 30 ditët e ardhshme do të dalë me një vendim përfundimtar për të ardhmen e aplikacionit."Kam folur me shumë njerëz për (aplikacionin) TikTok dhe ka interes të madh për TikTok-un," u tha ai gazetarëve në bordin e avionit presidencial ‘Air Force One’ gjatë një fluturimi për në Florida. Reuters raportoi më herët se dy persona që janë në dijeni të bisedimeve, i kanë pohuar se administrata e re po punon mbi një plan për të shpëtuar aplikacionin TikTok që përfshin kompaninë amerikane të teknologjisë kompjuterike ‘Oracle’. Sipas marrëveshjes që po negociohet nga Shtëpia e Bardhë, kompania mëmë e rrjetit TikTok, ByteDance do të vazhdojë të ketë rol, por mbledhja e të dhënave dhe përditësimi i rrjetit do të mbikqyret nga ‘Oracle’, që aktualisht mundëson infrastrukturën për funksionimin e TikTok-ut në Shtetet e Bashkuara. Sidoqoftë, në komentet e tij për gazetarët, Trump nuk e konfirmoi të ketë diskutuar me kreun e Oracle, Larry Ellison, për blerjen e aplikacionit. “Ka shumë njerëz të rëndësishëm që po flasin me mua, mbi mundësinë për ta blerë dhe ka të ngjarë që të marr vendim brenda muajit, tha Trump, duke shtuar se Kongresi amerikan ka dhënë për këtë gjë 90 ditë afat. “ Nëse mund ta shpëtoj Tiktok-un mendoj se do të ishte diçka e mirë”, u shpreh ai.