I dërguari i Posaçëm amerikan për Ballkanin Perëndimor, Gabriel Escobar I cilësoi marrëdhëniet me kryeministrin Albin Kurti jo të mira për shkak të mungesës së komunikimit për koordinimin e çështjeve me rëndësi të veçantë siç është ajo e heqjes së dinarit por dhe dialogut me Serbinë. “Më duhet të them se aktualisht kemi problem komunikimi me kryeministrin Albin Kurti dhe ky nuk është problem vetëm i Shteteve të Bashkuara. Mendoj se është problem në komunikim që Kosova ka me Bashkimin Evropian, me NATO-n, me Britaninë e Madhe, me Shtetet e Bashkuara dhe shumë partnerë të tjerë, përfshirë Shqipërinë dhe Maqedoninë e Veriu”, tha Escobar I cili shtoi gjatë bashkëbisedimit të zhvilluar me gazetarët në Bruksel, se SHBA ka pasur partneritet shumë të mirë në të kaluarën me Kosovën dhe se do donte që këto marrëdhënie të riktheheshin sërish. Kritika zyrtari I lartë amerikan pati dhe për çështjen e dinarit. Ai e cilësoi zbatimin e vendimit të bankës qëndrore të Kosovës si “katastrofik” dhe “jokompetent”. “Nuk e diskutojmë legjitimitetin e vendimit por zbatimin e tij. U desh pothuajse një vit për të zbatuar vendimin për përdorimin e euros, ndërsa në veri të Kosovës duan ta zbatojnë për më pak se tri javë. E dyta, qeveria nuk afroi alternativë që njerëzit të marrin pagesat që u takojnë. Dy javë para shpalljes së vendimit Kosova u pajtua bashkë me vendet tjera të Ballkanit Perëndimor për një mekanizëm pagesash që do të hyjë në fuqi deri në fund të vitit.”, nënvizoi ai. Deklaratat e Escobar erdhën përpara vizitës që ai do të zhvillojë në Prishtinë, ku do të takohet me krerët e lartë të shtetit të Kosovës për të folur për çështjen e dinarit por dhe atë të dialogut me Serbinë, ku do të kërkojë zbatimin e të gjitha marrëveshjeve të arritura vitin e kaluar në Bruksel dhe në Ohër.