Ambasada e Shteteve të Bashkuara të Amerikës pritet të kthehet në Kiev, deri në fund të majit nëse kushtet e lejojnë, kështu ka njoftuar të hënën e ngarkuara me punë, Kristina Kvien. Kvien ka deklaruar se është në pritje të sinjalit nga ekspertët e sigurisë se kur mund të bëhet kjo lëvizje.SHBA-ja vendosi ta mbyllë Ambasadën në Kiev më 14 shkurt dhe e zhvendosi përkohësisht një numër të vogël të personelit diplomatik në Lviv, vetëm 10 ditë përpara pushtimit rus të Ukrainës. Vendet perëndimore po lëvizin gradualisht për të rivendosur një prani diplomatike në Kiev. Kvien tha se, nëntë javë pas luftës, ishte e qartë se presidenti rus Vladimir Putin kishte "bërë një llogaritje të gabuar" në Ukrainë. Deklarata e saj erdhi pasi presidenti Biden ka propozuar një paketë të madhe ndihme prej 33 miliardë dollarësh për Ukrainën dhe pasi Kryetarja e Dhomës së Përfaqësuesve, Nancy Pelosi u takua me Presidentin Volodymyr Zelensky të shtunën. Pamjet: AFP