Në kohën kur po bëhen përpjekje për rifillimin e dialogut Kosovë-Serbi, ministri i Jashtëm serb, Nikolla Selakoviç u ankua, se nuk po sheh asgjë efikase nga Brukseli. Me tone viktimizimi, ai u ankua se shqiptarët po punojnë për krijimin e “Shqipërisë së Madhe”. "Nuk do shihni asgjë konkrete, ashtu siç nuk do shihni presione të qarta nga perëndimi kundrejt Prishtinës lidhur me dialogun me Beogradin. Planet për të krijuar Shqipërinë e Madhe janë një mundësi e mirë për të parë se sa do të heshtë Brukseli dhe gjithë të tjerët, të cilët nuk do reagojnë fare. Shqiptarët nga të dyja anët e kufirit po punojnë shumë për këtë lloj afrimi, ndërsa ndërkombëtarët heshtin për procese të tilla. Mund të shihet lehtësisht hipokrizia kur bëhet fjalë për sfidat me të cilat përballet i gjithë Ballkani Perëndimor," tha kryediplomati serb i cituar nga mediat në Kosovë. Selakoviç nga ana tjetër mohoi planet për një Serbi të Madhe. Ai insistoi se vendi i tij nuk po punon për t`u bashkuar me Republikën Srpska, por tha se përkundrazi, Beogradi e respekton integritetin territorial të Bosnje Hercegovinës në përputhje me Marrëveshjen e Dejtonit.