Ish-deputeti i Kosovës, Gramos Agusholli, është ndaluar nga autoritetet serbe në pikën kufitare të Merdarës. Lajmi bëhet i ditur nga Ministria e Jashtme e Kosovës, e cila njofton se ndalimi i ish-ligjvënësit u bë mëngjesin e kësaj të hëne. Sipas njoftimit të ministrisë, Agusholli - i cili nuk arriti të zgjidhet sërish si deputet në zgjedhjet parlamentare të 9 shkurtit, kur garoi në listën e Lëvizjes Vetëvendosje - ishte në tranzit drejt Sllovenisë kur u ndalua nga autoritetet serbe. “Dënojmë fuqishëm këtë veprim arbitrar të autoriteteve serbe dhe i bëjmë thirrje Bashkësisë Ndërkombëtare të reagojë menjëherë, duke kërkuar lirimin e menjëhershëm të z. Gramos Agusholli dhe ndalimin e praktikave të tilla represive, të cilat bien ndesh me parimet themelore të të drejtës ndërkombëtare dhe me konventat ndërkombëtare për të drejtat e njeriut”, thuhet në njoftimin e Ministrisë së Jashtme.