Policia e Kosovës njoftoi se një pjesë e kanalit të Ibër-Lepencit në Zubin Potokun me shumicë serbe, është dëmtuar me mjete të forta nga persona të panjohur. Raportimet për dëme në këtë kanal vijnë pothuajse një vit pas shpërthimit të fuqishëm që i shkaktoi atij dëme të rënda. Për ngjarjen e ndodhur 29 nëntorin e vitit 2024, Kosova fajësoi Serbinë, por Beogradi i mohoi akuzat. Prishtina zyrtare ende edhe sot shpërthimin në kanalin e Ibër-Lepencit e konsideron akt terrorist. Shtetet e Bashkuara kishin deklaruar atëherë se nuk kishte prova që e lidhnin drejtpërdrejt Beogradin me shpërthimin, por se ishte herët për të nxjerrë përfundime. Në hetimet për shpërthimin janë përfshirë edhe agjentët e Byrosë Federale të Hetimit, FBI. Prokuroria Speciale është ende duke e hetuar shpërthimin e 29 nëntorit, por deri më tani nuk ka ngritur ndonjë aktakuzë. Për atë ngjarje pati dhjetëra arrestime e u sekuestruan armë dhe eksplozivë, megjithatë vetëm dy persona, Dragisha dhe Jovan Viçentijevic u dërguan në paraburgim.