Presidenti i 47-të i Amerikës Donald Trump ka nisur të vërë në zbatim kërkesat e tij për ta bërë “Amerikën të madhe dhe të fuqishme sërish”. Në një kohë që vetë ai firmoste tarifat e reja 25% për mallrat nga Kanadaja dhe Meksika dhe 10% nga Kina, Sekretarin amerikan të Shtetit, Marco Rubio e kishte dërguar me mision, në një takim me krerët e shtetit të Panamasë, për të shtyrë përpara zbatimin e kërkesës së Trump që Shtetet e Bashkuara të rimarrin kontrollin e Kanalit të Panamasë. Kanali i Panamasë, që lidh Oqeanin Atlantik me atë Paqësor, përmes së cilit kalon rreth 40 për qind e trafikut të kontejnerëve në SHBA, konsideroht si rruga jetike për SHBA-të dhe nëse nuk do ta rimarrin atë, qëllimi sipas eskspertëve, është që të ulin ndikimin e Kinës në atë rajon. Mbetet e paqartë se çfarë mund të arrijë Rubio në mënyrë diplomatike për të kënaqur Panamanë, e cila refuzon me vendosmëri çdo pretendim kundër sovranitetit të saj.