Ministria ruse e mbrojtjes publikonte sot një video që supozohej të tregonte ushtarët e fundit që dorëzoheshin nga impjanti metalurgjik Azovstal në Mariupol. Pas një muaj rrethimi Rusia ka marrë nën kontroll bastionin e fundit të portit strategjik të Mariupol, pasi Ukraina urdhëroi trupat të dorëzoheshin për të kursyer jetët. Ministri rus i Mbrojtjes Sergei Shoigu tha se deri më tani, rreth 2000 luftëtarë ukrainas që ishin fshehur në fabrikën e çelikut, janë dorëzuar. Ushtarët që u larguan nga Azovstal, përfshirë edhe ata që ishin të plagosur, thuhet se u transferuan në territorin lindor të Ukrainës, nën kontroll te seperatistëve. Komiteti Ndërkombëtar i Kryqit të Kuq tha se qindra luftëtarë ukrainas që u larguan nga fabrika Azovstal në Mariupol, u regjistruan si robër lufte. Kryqi i Kuq thekson se regjistrimi i luftëtarëve si robër lufte është “i rëndësishëm për të siguruar që të trajtohen në mënyrë njerëzore dhe me dinjitet”. Kjo i mundëson organizatës t’i përcjellë të kapurit dhe t’i ndihmojë ata që të mbesin në kontakt me familjarët. Pamjet: AFP