Rusia vijoi bombardimet e pamëshirshme kundër Ukrainës të dielën, duke i goditur objektet e energjisë në të paktën dy rajone dhe duke shënjestruar disa lokacione të tjera në të gjithë vendin. Sulmet me dronë dëmtuan katër objekte energjetike në rajonin e Odesës, duke lënë pa rrymë më shumë se 29.000 banorë, tha në Telegram kreu rajonal Oleh Kiper. Kiper shtoi se sulmet ruse dëmtuan gjithashtu shtëpi private dhe ndërtesa të tjera dhe se një person u plagos. Një tjetër sulm me dronë goditi infrastrukturën civile energjetike në rajonin e Çernihivit në Ukrainën veriore, duke lënë pa energji elektrike 30.000 familje në qarkun Nizhin, njoftuan autoritetet, sipas të cilëve, furnizimi me rrymë është rikthyer për spitalin kryesor dhe sistemin e ujit të qytetit. Në mbarë vendin, mbrojtja ajrore rrëzoi 126 nga 142 dronët e zbuluar, ndërsa dronë të tjerë goditën në 10 lokacione, tha Forca Ajrore e Ukrainës. Breshëria e sulmeve pasoi ato në rajonin verilindor të Sumit, në kufi me Rusinë, të shtunën, ku një zyrtar i lartë i një fshati u plagos, njoftuan autoritetet. Sulmet e fundit ruse ndaj Ukrainës vijnë në një kohë kur Shtetet e Bashkuara të Amerikës, me në krye Donald Trump, po udhëheqin negociatat për armëpushim. Ndërkohë, aleatët evropianë janë zotuar se do t’i ofrojnë Ukrainës garanci për sigurinë, në rast të një armëpushimi, me mundësinë e përfshirjes së SHBA-ve gjithashtu.