Tjetër tragjedi në punë në Itali dhe viktima është sërish një punëtor shqiptar. Sipas mediave italiane ngjarja ndodhi në rrugën Garibaldi 51 në komunën e Magentës në afërsi të Milanos, ndërsa viktimë ka mbetur një punëtor shqiptar, vetëm 36 vjeç. Sipas asaj që raportojnë mediat italiane, ngjarja është e ende e paqartë, por paraprakisht thuhet të jetë shembur çatia e ndërtesës ku punonte shqiptari bashkë me të tjerë, duke zënë poshtë vetëm 36-vjeçarin. Shtetasi shqiptar ka marrë fillimisht plagë të rënda e më pas ka ndërruar jetë në spital. Policia ka nisur hetimet për ngjarjen e rëndë dhe nëse janë shkelur rregullat e sigurisë në punë në një kohë kur aksidente të tilla nuk janë aspak të rralla. Sipas mediave italiane që nga fillim ii vitit mbi 200 persona kanë humbur jetën si pasojë e aksidenteve në punë. Të shumtë janë edhe punëtorët shqiptarë që punojnë në ndërtim, të cilët kanë humbur jetën në vendin e punës.