Ka zgjatur vetëm pak muaj liria për ish-kryebashkiakun e Lezhës, Fran Frrokaj. Ky i fundit u lirua në prill të këtij viti, pasi përfitoi nga amnistia penale e miratuar me votat e Partisë Socialiste dhe asaj Demokratike, por do duhet të rikthehet në qeli. Apeli i GJKKO ka vendosur këtë të hënë të prishë verdiktin e Shkallës së Parë, duke dyfishuar dhe dënuar me 2 vite e 8 muaj burgim ish-kryetarin demokrat të Bashkisë së Lezhës. Shkalla e Parë kishte dhënë 1 vit e 4 muaj burgim për Frrokajn për tjetërsimin e pronave në bregdet, ndërkohë që SPAK kishte kërkuar dënimin që u dha këtë të hënë. Ish-kryebashkiaku Fran Frrokaj u gjet fajtor për “Shpërdorim detyre” dhe pritet të rikthehet në qeli e të vuajë dënimin e ri, pasi cili është i formës së prerë. Ndërkohë Apeli i Posaçëm dënoi për të njëjtën vepër penale me 1 vit e 4 muaj burg dhe ish-juristin e Hipotekës së Lezhës, Bledar Cara. Ndërkohë ish-punonjësja e Kadastrës në Bashkinë Lezhë, Juxhina Mema, u dënua me të njëjtën masë, por dënimi u pezullua. Të tre të dënuarve u caktua dënim plotësues i moslejimit të marrjes së një posti publik për 5 vjet. Hetimet për tjetërsimin e pronave nisën në vitin 2019-të, kur SPAK arriti të provojë përfitimin në mënyre të paligjshme të 66 mijë metrave katror tokë në bregdetin e Lezhës, më vlerë 13 milion euro. Sipas organit të akuzës, kjo sipërfaqe toke, e cila ishte pronë shtetërore, ishte tjetërsuar përmes falsifikimit të dokumenteve të pronësisë që nga origjina e pronës deri tek certifikata e pronësisë. Kjo nuk është hera e parë që ish-kryebashkiaku Frrokaj akuzohet për këtë vepër penale. Në një tjetër dosje të ngjashme për të njëjtat akuza, por për sipërfaqe të tjera prone, Frrokaj u dënua me 3 vite burg në tetor 2022 nga Gjykata e Apelit në Shkodër.