Serbia është tronditur së fundmi nga dy masakra të njëpasnjëshme, ku mbetën të vrarë 17 persona dhe mbi 20 të tjerë u plagosën, e në këto ditë të vështira shumë vende e në mesin e tyre edhe Kosova kanë shprehur ngushëllime dhe i janë bashkuar dhimbjes. Madje qytetarët u solidarizuan në Prishtinë dhe ndezën qirinj për viktimat por për këtë modelja e njohur shqiptare, Arbenita Ismaili, ka reaguar ashpër duke e quajtur si një akt të turpshëm nga ana e qeverisë dhe të atyre që kanë harruar vuajtjet që ky popull i ka shkaktuar Kosovës. Ajo ka ndarë në profilin e saj në Instagram një shkrim, që tregonte se në Prishtinë ishin ndezur qirinj për të përkujtuar të vrarët. Për të gjithë ata Arbenita thotë se po bëjnë turp duke ju kujtuar fotot e eksodit të shqiptarëve të Kosovë të përzënë me dhunë gjatë luftës së viteve 1998-99. “Marre, marre, marre. E keni kënaq popullin tonë, gratë shqiptare, edukimin e fëmijëve shqiptarë dhe edhe kjo iu ka mbet”, ka shkruar modelja.