Rikthimi i reshjeve të shiut përkeqësoi sërish situatën me motin në vend. Situata më e vështirë paraqitet në Pogradec, ku autoritetet njoftojnë për bllokimin e segmentit hyrës në Unazën e qytetit, kur vjen nga Qafë Thana. Sipas njoftimit, thuhet se rruga do të jetë përkohësisht e bllokuar për qarkullim, për shkak të rrezikut të rënies së gurëve, si pasojë e dëmtimit të një pjese të skarpatës, nga reshjet e fundit. Punonjësit e emergjencave ndodhen në terren, ndërsa puna do të vijojë edhe gjatë të enjtes për stabilizimin dhe përmirësimin e skarapatës së kodrës, ndërsa hapja e rrugës do të bëhet pas përfundimit të punimeve. Situata nga reshjet e dendura të shiut është përkeqësuar edhe në Qarkun e Gjirokastrës. Në Delvinë raportohet për tre fshatra të izoluara, pasi prurjet e tepërta shkatërruan urën që i lidhte. Reshjet e të mërkurës shkaktuan shembje edhe në rrugën Elbasan-Gjinar, pranë fshatit Dërstilë, duke krijuar probleme për banorët e zonës turistike.