Eurodeputetja Viola von Cramon, reportere për Kosovën në Parlamentin Europian e quajti të papranueshëm faktin që kryeministri i Kosovës, Albin Kurti votoi në Shqipëri. “ Këtë gjë unë nuk e kuptoj dot. Nga njëra anë, të gjithë në Kosovë ankohen për ndërhyrjet nga Serbia apo edhe vetë presidenti Vucic, dhe nga ana tjetër, kryeministri i Kosovës shkon e voton ne një shtet fqinj. Kjo nuk mund të pranohet. Të paktën, për mua jo”, ka shkruar ajo në Twiiter. Kurti e hodhi herët në mëngjes votën e tij. Edhe pse lideri i vetëvendosjes ka nënshtetësinë shqiptare, kjo përbën të parën herë që shef ekzekutivi i Kosovës voton në Shqipëri. Partia e tij garon në vendin tonë me tre kandidatë të regjistruar si të pavarur. “Dita e zgjedhjeve është ditë e demokracisë. I ftoj të gjithë qytetarët e Shqipërisë që sot ta respektojnë atdheun, duke bërë zgjedhjen më të mirë sipas parimeve dhe vlerave që secili i ka. Dita është e bukur, me diell, kështu do të jetë deri në mbrëmje, uroj sa më shumë ditë të bukura dhe mbarësi për Shqipërinë dhe secilin njëri, që ashtu sikurse unë ka pasaportën e Republikës së Shqipërisë”, tha Kurti. Vendimi për të bërë fushatë në Shqipëri ka nxitur kritika edhe nga rivalet politikë në Kosovë, të cilët e kanë quajtur ndërhyrje në punët e brendshme të vendi fqinj.