Në Universitetin “Fan S. Noli” të Korçës kanë nisur regjistrimet e studentëve për këtë vit akademik. Me fillimin e fazës së parë, 80 maturantë kanë zgjedhur programet e tyre të preferuara. Regjistrimet do të vijojnë në shtatë faza deri në muajin shtator. Ajo që është vënë re krahasuar me një vit më parë, ka qenë gjatë fazës së aplikimeve drejt këtij universiteti, të cilat janë rritur me gati 30%, por mbetet për t’u parë nëse interesi i treguar në aplikime do të përkthehet në një numër më të madh studentësh të regjistruar në Universitetin e Korçës. Interesi i të rinjve është përqendruar te degët që kërkohen më shumë në tregun e punës, teknologjia e informacionit, infermieria dhe programet e fakultetit të Ekonomisë përveç Ekonomiksit, i cili nuk është hapur për mungesë kërkese në vitet e fundit.