Kryeministri Edi Rama i përgjigjet kompanisë së “Tik Tok’”, që kërkoi sqarime urgjente nga qeveria shqiptare për mbylljen e platformës. “TikToku nuk ka çfarë sqarimesh kërkon nga Shqipëria, sepse në Shqipëri vendosin shqiptarët jo pronarët e algoritmit të TikTokut”, shkruan kryeministri Rama, i cili nuk e quan vendim të nxitur mbylljen e kësaj platforme. “Ndalimi i TikTokut për (të paktën) një vit në Shqipëri, nuk është një reagim i nxituar ndaj thjesht një ngjarjeje, por një vendim i këshilluar gjerësisht me komunitetet e prindërve në shkollat e gjithë Shqipërisë. TikToku nuk ka çfarë sqarimesh kërkon nga Shqipëria, sepse në Shqipëri vendosin shqiptarët jo pronarët e algoritmit të TikTokut. Më tej, kreu i qeverisë shqiptare i përgjigjet ashpër kompanisë, lidhur me pretendimin se ngjarja e rëndë pranë gjimnazit “Fan Noli” në Tiranë nuk kishte lidhje me “Tik Tok”, por se videot që çuan në këtë incident postoheshin në një platformë tjetër. “Të thuash se vrasja e nxënësit adoleshent s’ka lidhje me TikTokun, sepse konflikti nuk qenka gjeneruar nga Tik Toku do të thotë të mos kesh kuptuar as seriozitetin e kërcënimit që ajo plaftormë ka sjellë për fëmijët dhe rininë e kësaj kohe, as fillin e arsyetimit të vendimit tonë për të marrë përgjegjësinë e reagimit ndaj atij kërcënimi”. Teksa rikujton edhe njëherë se mbyllja e Tik Tok u kërkua nga mbi 90% e prindërve shqiptarë, kryeministri Edi Rama e mbyll me mesazhin e fortë se “Ose vetë TikToku duhet t’i mbrojë fëmijët e Shqipërisë ose Shqipëria do t’i mbrojë fëmijët e vet nga TikToku”.