Rrugëtimi i Shqipërisë në Bashkimin Evropian ishte fokusi kryesor i kryeministrit Edi Rama në takimin me kandidatët e rinj dhe qytetarët shkodranë, pasditen e kësaj të mërkure. Për të fituar pasaportën e BE, Rama tha se i duhen votat e shqiptarëve për një mandat të katërt. Rama vlerësoi si historike punën e institucioneve të reja të drejtësisë, SPAK e GJKKO, pasi sipas tij, bënë që të gjithë të jenë të barabartë para ligjit. Nga qyteti verior, Rama ironizoi dhe kreun e opozitës, Sali Berisha, për deklaratat e tij për shkrirjen e SPAK, ndërsa ju bëri thirrje edhe demokratëve që të votojnë Partinë Socialiste. Rama tha se PS mori përsipër sprovën për ndarjen e drejtësisë nga pushteti politik, ndërsa tha se puna në qytetin verior dhe gjithë vendin do të vazhdojë edhe pas 11 Majit.