Kryeministri Edi Rama u prit në Romë me ceremoni zyrtare nga homologia e tij italiane, Gorgia Meloni. Pasi u luajtën himnet kombëtare të dy vendeve, Rama dhe Meloni zhvilluan një takim “kokë më kokë” në Palazzo Chigi, dhe më pas pati dhe një takim të përbashkët mes delegacioneve të dy vendeve, ku u rikonfirmua njëzëri miqësia tradicionale Shqipëri - Itali dhe vullneti për të thelluar bashkëpunimin edhe më tej. Një pikë tjetër ku u diskutua ishte dhe forcimi i mëtejshëm i marrëdhënieve në fushën ekonomike. Në takim u fol edhe për mundësinë e investimeve që ofron Shqipëria në shumë sektorë potenciale, si energjia, infrastruktura, bujqësia, e veçanërisht turizmi, i cili këtë vit shënoi një rekord të vërtetë rritjeje. Në kuadër të këtyre diskutimeve, Rama më herët mori pjesë edhe në mbledhjen e Komitetit të përbashkët ekonomik mes dy vendeve që u drejtua nga zv/kryeministri Italian Antonio Tajani.