Kryeministri Edi Rama ndodhet sot në Shkup ku po merr pjesë në takimin e liderëve të pesë vendeve anëtare të NATO-s nga Europa Juglindore. Para nisjes zyrtare të takimit, kryeministri Rama zgjodhi të flasë në shqip, duke uruar shqiptarët e Maqedonisë së Veriut për “ditën e bekuar të alfabetit”. Kjo konferencë tha kryeministri mblidhet në një moment jo të lehtë edhe për rajonin tonë që duhet të ruajë paqen e brishtë të arritur mes nesh duke vijuar të punojmë për një paqe përfundimtare dhe të qëndrueshme. “Së pari dëshiroj që në gjuhën shqipe t’u uroj të gjithë shqiptarëve këtu në Maqedoninë e Veriut ditën bekuar të Alfabetit. Nga ana tjetër, më vjen shumë mirë që sot mblidhemi këtu në këtë moment jo të lehtë për të gjithë, një moment luftërash dhe krizash të rënda, që kanë potencialin të rrezikojnë drejtpërdrejtë edhe anën tonë, një moment kur këtu në rajon të gjithë duhet të fokusohemi tek mbrojtja dhe ruajtja e asaj që kemi arritur, që është jo pak, një paqe e brishtë e përgjithshme, po sidoqoftë një paqe dhe të vëmë të gjitha forcat për ta bërë këtë paqe përfundimtare dhe të qëndrueshme.”