Kryetari i Partisë Socialiste në takimin me kandidatët e Fierit deklaroi se Berisha po përgatitet të justifikojë humbjen më 12 maj. Edi Rama komentoi listën e koalicionit të Partisë Demokratike dhe theksoi se vota e 11 majit është votë për Shqipërinë në BE. “Ne nuk kemi bërë primare por ata nuk janë primare, por papare.... Ata që fituan i lanë jashtë. Kryetari i PD-së në Kavajë del i pari në qark dhe ata e lënë jashtë. Po të shikosh listën e kënetës ajo është listë për në opozitë. Është bërë për të qenë me një tufë qorrash e shurdhësh e kua kuashë në opozitë. As shohin as dëgjojnë vetëm recitojnë. Kua Kua! Është bërë gati për të qenë në opozitë e në 12 maj jo për të çliruar TikTok, se nuk ka çfarë çliron por për të thënë na i vodhën, fituam por na e morën. Etj etj, puna e tyre si gjithmonë. Pse duhet atëherë demokratët të hedhin votën kot? Për një grup që thjesht funksionon si grup interesi i ngushtë që është përgatitur për të qëndruar në opozitë”. Takimet në Fier kryeministri Edi Rama, njëkohësisht kreu i Partisë Socialiste, i mbylli në një mbledhje me të rinjtë socialistë. Duke e cilësuar Fierin kryeqytetin e socialistëve, Rama kërkoi votën e fierakëve në zgjedhjet parlamentare të 11 Majit, për t’u shkëputur nga e kaluara. “Një brezi mund t’i vijë ose mund të mos i vijë shansi për të bërë histori. Brezi i atyre që i dhanë goditjen e fundit regjimit komunist iu dha shansi të bëjnë histori. Ishte ai brez që në ’91-’92, me votën e tyre bënë histori, duke e futur Shqipërinë në një sistem të hapur. Në 11 maj keni shansin të bëni histori, për vendin dhe veten tuaj”. Kryeministri deklaroi se për 10 vite Shqipëria ka përfituar 1 miliard euro nga BE dhe sipas tij nëse hyjmë në Bashkimin Europian kjo shumë do të merret çdo vit.