Shqipëria nuk është tërhequr nga vendimi për mbylljen e platformës sociale “Tik Tok”. Lajmin e dha kryeministri Edi Rama, i cili tha se për momentin nuk ka zgjidhje tjetër, ndërsa shtoi se vijojnë diskutimet me platformën kineze për shqetësimet e ngritura. Gjatë një “Podkasti” me dy studente të Departamentit të Gazetarisë, në Universitetin e Tiranës, ku tashmë do të ketë një laborator të mediave digjitale me teknologji të avancuar, kryeministri u ndal dhe te sulmet kibernetike, duke thënë se janë marrë masa për të forcuar mbrojtjen. Kryeministri Rama iu përgjigj edhe pyetjes për papunësinë dhe largimin e të rinjve, për të cilën tha se po punohet me këmbëngulje për të gjetur zgjidhje. Politika shqiptare në sytë e Ramës si piktor do të ishte një kaos koloristik, ku siç tha vetë kryeministri, do t’i përdorte të gjitha ngjyrat; ndërsa bisedës së veçantë me studentet nuk i munguan as batutat.