Gjatë një ligjërate para studentëve në Kolegjin e Europës në Bruzh, Kryeministri Edi Rama vlerësoi me superlativa Bashkimin Europian. Rama nisi fjalimin me një rikthim në kohën e diktaturës komuniste. “Europa ishte një ëndërr bardh e zi. Muri i Berlinit ra në vitin 1989, por Shqipëria mbeti e izoluar, e mbyllur në bunkerin e vet”. Kryeministri e cilësoi Bashkimin Europian si një bekim për Shqipërinë dhe tha se vendi ynë është në rrugë të mbarë drejt anëtarësimit. “Falë Zotit ekziston BE, pa BE mund të ishim ende duke pritur për qindra vite duke ndërtuar institucione. Ky është një bekim që ne në Shqipëri dhe rajon e kemi. Këto nuk janë ditët më të mira për Europën, por mos harroni se Brenda këtij kufiri të brendshëm jemi ne, Ballkani. Mendoj që së fundmi jemi në rrugë të mbarë”. Sa i përket konfliktit në Ukrainë, Rama bëri thirrje për një strategji të qartë europiane që ofron garanci sigurie për Kievin. “Europa ka nevojë për një plan. Duhet të jetë forcë udhëheqëse në ndërtimin e paqes”, deklaroi Rama. Në përmbyllje, ai ftoi studentët që të vizitojnë Shqipërinë dhe nuk e kurseu ironinë ndaj Nigel Farage, politikanin britanik që ka kritikuar emigrantët shqiptarë në Mbretërinë e Bashkuar. “Kur largohesh nga Bashkimi europian fillon të flasësh gjepura. Merrni pak kamomil para se ta dëgjoni, që të mos ju zërë depresioni. Unë po ju ftoj të vini tek ne dhe të shihni me sytë tuaj ndryshimin. Shqipëria është një vend që ia vlen ta vizitosh” Rama theksoi se Shqipëria është ndër vendet me kriminalitet më të ulët në Europë dhe është një destinacion që ia vlen të vizitohet.