Kryeministri i Shqipërisë, Edi Rama, i cili ndodhej në Shkup të martën në kuadër të Samitit BE–Ballkani Perëndimor, e shfrytëzoi rastin edhe për një shëtitje simbolike në Çarshinë e Vjetër të qytetit, i shoqëruar nga nënkryetari i BDI-së, Bujar Osmani. Kjo dalje e përbashkët nuk ka vetëm karakter informal apo protokollar, por mbart një mesazh të qartë politik, veçanërisht duke pasur parasysh se ndodh në prag të zgjedhjeve lokale në Maqedoninë e Veriut. Prania e Edi Ramës përkrah një figure të lartë të BDI-së si Bujar Osmani shihet si një gjest mbështetjeje, por edhe si sinjal i konsolidimit të bashkëpunimit ndërshqiptar në rajon. Rama u takua edhe me kryetarin e “Aleancës për Shqiptarët”, Arben Taravarin, i cili është larguar tashmë nga koalicioni qeveritar dhe ka kaluar në opozitë. Prandaj edhe shëtitja e kryeministrit shqiptar në Çarshi nuk ishte thjesht një vizitë turistike, por është parë edhe si një lëvizje e menduar politikisht. Takimet e shumta bilaterale kulmuan mbrëmjen e djeshme me një takim mes Kryeministrit Rama dhe liderit të BDI-së, Ali Ahmeti. Kjo prani dhe angazhimi aktiv i liderëve shqiptarë në Maqedoninë e Veriut rikonfirmon peshën e dimensionit shqiptar në proceset integruese dhe zhvillimore të rajonit.