Presidenti serb Aleksandër Vuçiç la të hapur mundësinë se Millan Radoiçiçi, organizatori I sulmit të armatosur në Banjskë, mund të merret në pyetje nga autoritetet serbe. “Unë jam i sigurt se autoritetet kanë arsye të bëjnë pyetje, dhe se a do ta ndjekë penalisht prokurori dhe për çfarë krimi, kjo nuk është pyetje për mua. Është pyetje për prokurorin dhe organet e tjera kompetente shtetërore”, tha Vuçiç gjatë një konference me gazetarët ndësa shtoi se ai nuk do të fshihet, raporton Radoi Europa e Lirë. Presidenti serb njoftoi gjithashtu se për ngjarjen pati dhe një bisedë telefonike me sekretarin amerikan të shtetit, Antony Blinken. Një bisedë “të gjatë” dhe “jo të lehtë” siç e përshkroi ai ndërsa theksoi se u ra dakord për shtensionim dhe një rol më të madh nga ana e KFOR-it në veri të Kosovës. Ai tha gjithashtu se Blinken foli edhe për masa të mundshme, kundër Beogradit nëse nuk vepron siç duhet. Sulmi në Banjskë u dënua nga SHBA-ja dhe Bashkimi Evropian. Shumë anëtarë të Bashkimit Evropian kërkojnë edhe vendosjen e masave kundër Serbisë nëse vërtetohet lidhja e Beogradit me sulmin në Banjskë. Pamjet: AFP