66 % e punimeve fizike në segmentin e tretë të aksit rrugor Qukës-Qafë Plloçë kanë përfunduar, ndërsa po vijon puna për të bërë të mundur dorëzimin e rrugës gjatë vitit të ardhshëm. Autoriteti Rrugor Shqiptar bën të ditur se aktualisht në këtë segment po punohet për formimin e trupit të rrugës në mbushje dhe gërmim, punime të cilat janë drejt përfundimit. Paralelisht vijon puna gjatë gjithë gjatësisë së rrugës për mbrojtjen dhe sistemimin e skarpatave me rrjeta. Projekti bazë për ndërtimin e tre loteve të aksit rrugor Qukës-Qafë Plloçë është hartuar vite më parë, por për shkak të problemeve me projektin, ku u panë mospërputhje mes projektit dhe terrenit, punimet për përfundimin e rrugës u vonuan. Segmenti i parë dhe segmenti i dytë i aksit rrugor Qukës-Qafë Plloçë do të dorëzohen në dhjetor të vitit 2024, ndërsa segmenti i tretë pritet të përfundojë deri në mars të vitit të ardhshëm. Rruga Qukës-Qafë Plloçë do të ketë 6 ura të mëdha si dhe 2 tunele të mesme njëri 800 e tjetri 600 metra. Ky projekt përmirëson parametrat e rrugëtimit dhe bën të mundur aksesimin e trafikut, që kalon ndërmjet Korridorit 8 nga aksi rrugor Tiranë-Elbasan me pjesën e juglindjes, si dhe shkurtimin e distancave me pikën e kalimit kufitar të Kapshticës, qytetin e Korçës dhe më tej.