Vendimi i marrë nga Gjykata e Strasburgut në nëntor të vitit 2023 për të dëmshpërblyer financiarisht familjarët e viktimave të tragjedisë së Gërdecit u ekzekutua këtë të mërkurë nga qeveria shqiptare. Mbi dokumentin që mban firmën e kreut të qeverisë, Edi Rama thuhet se do të dëmshpërblehen financiarisht me më shumë se 170 mijë euro 17 persona të plagosur, por edhe familjarë të viktimave të një prej tragjedive më të mëdha që ka kaluar vendi ynë. Nga shuma totale 12 mijë euro do shkojë si dëmshpërblim për Zamira e Feruzan Durajn, prindërit e të ndjerit Erison Durdaj, ndërsa nga 10 mijë euro shpërblim do të marrin 15 personat e tjerë të plagosur ose familjarë të viktimave. Po ashtu pritet që qeveria shqiptare të paguajë edhe 8 mijë euro për kosotot dhe shpenzimet e çështjes “Durdaj dhe të tjerë kundër Shqipërisë”. Në VKM-në e qeverisë specifikohet gjithashtu se dëmshpërblimi do të jepet brenda 3 muajve, nga Ministria e Financave, pas paraqitjes së dokumentacionit të nevojshëm ligjor për kryerjen e pagesave që do të merren nga fondi rezervë I buxhetit të shtetit. Në vendimin e Gjykatës së Strasburgut theksohej se zgjedhja e Gërdecit si vend objekti i çmontimit të armëve ishte bërë në kundërshtim me ligjin dhe rregulloret e shtetit dhe se një operacion i përmasave të tilla nuk duhet të ishte kryer kurrë në një vendndodhje afër banesave dhe rrugëve.