Ky që shihni në foto është Elvis Shkambi, autori i vrasjes së gjyqtarit të Apelit, Astrit Kalaja. 30-vjeçari që kreu krimin e rëndë, është nipi i Gjon Shkambit, palë paditëse në çështjen ku gjyqtari i ndjerë rrëzoi kërkesën e tyre. Pas kësaj Shkambi nxori armën dhe qëlloi disa herë me pistoletë drejt gjyqtarit Kalaja, duke i shkaktuar vdekjen e menjëhershme. Dëshmia e sekretares gjyqësore konfirmon se të shtënat ndodhën sapo u shpall vendimi. Pas vrasjes së gjyqtarit, agresori hapi zjarr edhe drejt Ervis dhe Rakip Kurtaj, pala kundërshtare në proces, të cilët mbetën të plagosur dhe u dërguan me urgjencë në spital. Mjekët bëjnë me dije se gjendja e tyre është e stabilizuar. Mësohet se pas krimit, Elvis Shkambi, ka dalë jashtë sallës së gjyqit me armë në dorë ku është neutralizuar nga forcat e rendit. Ai nuk ka bërë rezistencë dhe Top Channel mëson se para hetuesve ai e ka pranuar autorësinë e ngjarjes, duke deklaruar se reagoi për “një vendim të padrejtë”. Familja Shkambi pretendon të jetë trashëgimtare e ligjshme e një prone në Shkodër, e shtetëzuar gjatë regjimit komunist, e më pas e dhënë për strehim nga bashkia për 31 familje. Mësohet se Shkambi kishte paralajmëruar edhe më herët se “atë pronë nuk do ta gëzonte askush përveç familjes së tij”. Ndërkohë, hetimet nuk po kufizohen vetëm te autori i krimit. Një oficer policie që shërbente në hyrje të gjykatës është ndaluar, pasi dyshohet për shpërdorim detyre, për shkak se nuk kreu kontrollin fizik dhe nuk aktivizoi detektorin e sigurisë në hyrje, duke lejuar futjen e armës brenda në ambientet e gjykatës.