Kanali shtetëror rus, Russia Today rinisi transmetimin transmetimin online të programit të tij në gjuhën serbe, dhe këtë zgjodhi ta bënte me një mesazh, i cili bie mjaft rëndë në këto momente tensionesh në veriun e Kosovës. “Ne e nisëm RT-në në Ballkan, sepse Kosova është Serbi”, deklaroi kryeredaktorja e RT-së, Margarita Simonyan. Edhe pse sic shpjegohet në uebsajtin e RT-së në gjuhën ruse, transmetimi i programit televiziv në gjuhën serbe do të fillojë në vitin 2024, mesazhi mjafton për të treguar mbështetjen e plotë të Moskës për Beogradin, dhe i ngjan një ftese për largim nga rruga e dialogut. "Mesiguri, askund në botë nuk na kanë pritur aq shumë sa këtu. Unë dua t'u drejtohem serbëve të dashur në gjuhën e tyre: 'Vëllezër, shikoni RT'", tha Simonyan në një njoftim zyrtar të televizionit shtetëror rus.Bashkimi Europian e pezulloi në 1 mars transmetimin e disa mediave të mbështetura nga Rusia, përfshirë RT. Blloku evropian ka sanksionuar edhe Margarita Simonyan, kryeredaktore e kanalit të RT-së në gjuhën angleze. “Sputnik dhe Russia Today janë nën kontroll të drejtpërdrejtë apo jo të drejtpërdrejtë të autoriteteve të Federatës Ruse dhe janë instrumente të rëndësishme për të rritur mbështetjen për agresionin ushtarak kundër Ukrainës, si dhe për destabilizim të shteteve fqinje”, tha atëherë shefi i diplomacisë së BE-së, Josep Borrell. Që prej njoftimeve jozyrtare në korrik se Russia Today planifikonte hapjen e një stacioni televiziv në Serbi, BE-ja reagoi duke thënë se pret që Serbia të frenohet nga intensifikimi i marrëdhënieve me Rusinë. Pamjet: AFP