Britania dhe Irlanda Veriore u përfshinë nga protestat e dhunshme gjatë javës së kaluar, pas vrasjes së tre vajzave të mitura në një sulm me thikë. Protestat, që janë drejtuar kryesisht kundër emigrantëve myslimanë, u nxitën pas përhapjes së një lajmi të rremë nga aktivistët e krahut të djathtë se autori i sulmit ishte një emigrant mysliman i sapo ardhur në Britani. Kryeministri britanik Keir Starmer mbajti sot një takim urgjent me ministrat dhe zyrtarët e lartë të zbatimit të ligjit, në kuadër të përpjekjeve për t’i dhënë fund dhunës nëpër rrugë dhe sulmeve ndaj hoteleve ku strehohen azilkërkuesit. Kryeministri britanik tha se qeveria e tij do të përdor “forcën e plotë të ligjit” kundër protestuesve të dhunshëm që prej një javë kanë krijuar kaos në Britani dhe Irlandën Veriore. Trazirat shpërthyen javën e kaluar pasi tre vajza u vranë në një sulm me thikë në qytetin Southport në Anglinë veriperëndimore. 420 individë janë arrestuar deri më tani. Grupet kundër emigrantëve dhe kundër myslimanëve përhapën dezinformata në internet se autori i dyshuar i sulmit ishte një islamist radikal i cili sapo kishte mbërritur në Britani. Sipas policisë i dyshuari ka lindur në Britani dhe sipas njoftimeve të mediave, familja e tij është e krishterë dhe rasti në Southport nuk po trajtohet nga policia si incident terrorist. IP/ AFP