Në Shkup mijëra qytetarë protestuan sërish për ngjarjen e rëndë që u mori jetën 59 njerëzve në Koçan të dielën e shkuar. Me moton “Kush është i radhës” protestuesit kanë bërë thirrje që të ndëshkohen përgjegjësit për viktimat e zjarrit në diskotekën që funksiononte ilegalisht. Brigada e Zjarrfikësve të Koçanit ka konfirmuar se në afërsi të diskotekës ka pasur një depozitë me naftë, por që i përkiste një një objekti tjetër. Ata thanë se është rrezikuar shumë që përmasat e tragjedisë të ishin akoma më të rënda. Autoritetet njoftuan se ceremonia mortore për 59 viktimat në Koçani do të kryhet të enjten më 20 mars, ndërsa koha e saktë ende nuk është publikuar. Kryeministri Hristijan Mickoski, sot duke iu përgjigjur pyetjeve të gazetarëve ka thënë se askush nuk do t’i shpëtojë përgjegjësisë për ngjarjen e rëndë, ndërsa lidhur me sigurinë dhe licencat për lokalet e natës ai deklaroi se po vazhdon operacioni i Inspektoratit Shtetëror të Tregut në të gjithë territorin e shtetit.