Më shumë se 41 mijë anëtarë të partisë demokratike votuan për kandidatët që duan t’i përfaqësojnë në parlament. Në garën e primareve morën pjesë rreth 288 kandidatë të cilët aspirojnë të bëhen pjesë e listës zyrtare të PD. “Kjo është një ditë e rëndësishme për PD, për pluralizimin politik dhe për lirinë. PD prin në betejën e saj për liritë e të drejtat e saj”, tha Berisha. Qendrat e votimit u mbyllën në orën 18:00 ndërsa procesi i numërimit nisi rreth orës 21:00, ku degët e PD u shndërruan në KZAZ për të numëruar vullnetin e demokratëve. Fituesit e primareve nuk do jenë automatikisht pjesë e listës së Partisë Demokratike pasi duhet të kalojnë edhe një tjetër filtër, atë të kryesisë së partisë demokratike, e cila krahas votave në përzgjedhjen e kandidatëve do vlerësojë dhe kontributin e gjithsecilit në luftën kundër qeverisë dhe punën për mbledhjen e votave të diasporës. Drejtuesit politik nuk iu nënshtruan garës së primareve, ndërkohë pjesa më e madhe e grupit parlamentar mori pjesë në zgjedhjet e brendshme që u zhvilluan këtë të shtunë në PD dhe vetëm 6 prej tyre nuk u bënë pjesë e garës.