Kreu i Inteligjencës Qendrore Amerikane, William Burns vizitoi këtë javë Bosnjen, Serbinë e Kosovën. Ndryshe nga dy vendet e tjera, vizitën në kryeqytetin serb Burns e përfundoi në një lloj fshehtësie, pa bërë të ditur se me kë u takua zyrtarisht. Media serbe Danas pretendon megjithatë se kreu i shtetit serb Aleksandar Vuçic ka rrëfyer sot se zhvilloi një bisedë shumë të dobishme dhe të mirë me shefin e CIA-s. Vucic thotë se temat e trajtuara lidheshin me të ardhmen e rajonit dhe Serbisë, dhe e cilësoi takimin si të denjë dhe të rëndësishëm. Burns, u takua të premten në Prishtinë me kryeministrin e Kosovës, Albin Kurti, i cili u kthye nga Shtetet e Bashkuara, ku mori pjesë në Kuvendin e demokratëve në Çikago. Një ditë përpara kësaj, kreu i CIA-s u takua me dyer të mbyllura me Presidenten e Kosovës Vjosa Osmani si dhe me krerë të institucioneve të sigurisë. Nuk janë dhënë hollësi rreth vizitës, ndërsa presidentja Osmani në një postim në Facebook shkroi se “Aleanca me Shtetet e Bashkuara, garanci për siguri, paqe e sukses”!