Presidenti i Shteteve të Bashkuara, Donald Trump, thotë se bisedimet e Uashingtonit me Teheranin në Oman, kanë qenë të mira dhe pret rinisjen e një raundi të ri, javën që vjen. Nga bordi i Air Force One, presidenti sqaroi se bisedat do të rinisin në fillim të javës. Shtetet e Bashkuara shpallën sanksione të reja ndaj kompanive të transportit detar dhe anijeve, me synimin për të kufizuar eksportet e naftës së Iranit. Gjithashtu, Trump firmosi një urdhër ekzekutiv që i hap rrugë vendosjes së tarifave ndaj mallrave nga vendet që bëjnë tregti me Iranin. Këto masa mund të prekin shkëmbimet tregtare me vende si Kina, Gjermania dhe Emiratet e Bashkuara Arabe. Nuk është e qartë nëse këto masa lidhen drejtpërdrejt me bisedimet, por trump thotë se po kërkon të arrijë një marrëveshje dhe paralajmëron për pasoja të rënda nëse Irani nuk bie dakord. Shtëpia e Bardhë ka bërë të qartë se synimi kryesor i bisedimeve është frenimi i aftësisë së Iranit për të prodhuar armë bërthamore, një ambicie që Republika Islamike e ka mohuar vazhdimisht. Përvec paralajmërimeve për ndalimin e vrasjes së protestuesve në Iran, ditët e fundit, retorika e Trump është përqendruar kryesisht në frenimin e programit bërthamor iranian, ndërsa SHBA ka dislokuar në rajon një grup detar të udhëhequr nga aeroplanmbajtësja USS Abraham Lincoln. Irani ka paralajmëruar vazhdimisht se do të sulmojë bazat amerikane në rajon nëse do të sulmohet.