Presidenti Bajram Begaj u prit në një audiencë të veçantë në Selinë e Shenjtë në Vatikan nga Shenjtëria e tij, Papa Francesku. Kjo është hera e dytë që Kreu i Shtetit takohet me Papa Franceskun pas asaj të dhjetorit të vitit 2022. Begaj e falendëroi përzemërisht Papa Franceskun për këtë pritje duke i shprehur atij urime të sinqerta për angazhimin e fuqishëm në përhapjen e paqes. Përmes mesazheve të drejtpërdrejta, tha Begaj, Ati i Shenjtë ka kërkuar t’i jepet fund luftërave sidomos në zonat e nxehta të konfliktit në Ukrainë dhe në Lindjen e Mesme. Për këto konflikte, Presidenti i Republikës konfirmoi qëndrimin e Shqipërisë në krah të aleatëve perëndimorë për zgjidhjen përmes dialogut, si i vetmja garanci për stabilitet dhe zhvillim të qëndrueshëm në rajonin e Ballkanit dhe me gjerë. Gjatë takimit me Papa Franceskun Presidenti Begaj i dhuroi Atit të Shenjtë një pikturë të Kishës së Kuvendit të Rubikut, një ikonë e krishtërimit shqiptar dhe një ndër kishat më të vjetra në Ballkan. Presidenti Begaj u prit në një takim edhe nga Sekretari i Shtetit, Kardinal Parolini me të cilin diskutoi për avancimin e reformave me qëllim integrimin e Shqipërisë në BE si anëtare me të drejta të plota në Bashkimin Evropian.