Kreu I shtetit, Bajram Begaj përshëndeti vendimin e Komitetit të Ministrave pranimin dhe kalimin e kërkesës së Kosovës për anëtarësim në Këshillin e Evropës në Asamblenë Parlamentare “Përshëndes vendimin e Komitetit të Ministrave, për kalimin në Asamblenë Parlamentare të kërkesës legjitime të Kosovës për anëtarësim në Këshillin e Evropës. Urime Kosovë dhe sa më shpejt anëtare me të drejta të plota në KiE!”, shkruajti Presidenti Begaj në Tëitter. Një lajm të shkëlqyer e quajti vendimin dhe ministrja e punëve të jashtme, Olta Xhaçka, e cila theksoi se ky është vetëm hapi I parë I Kosovës në rrugëtimin europianë. “Lajm i shkëlqyer nga Këshilli i Evropës! Komiteti i Ministrave vendosi të pranojë kërkesën e Kosovës për anëtarësim dhe t'ia dërgojë Asamblesë Parlamentare për të dhënë mendimin e saj. Një hap i parë, i rëndësishëm për t'i dhënë Kosovës vendin e merituar në Këshill!”, nënvizoi Xhaçka. Mesazheve përshëndetëse iu bashkua dhe kryetarja e kuvendit Lindita Nikolla. Ajo e cilësoi vendimmarrjen një arritje, jo vetëm për shtetin e Kosovës, por dhe për Shqipërinë. “Kuvendi i Shqipërisë është përfshirë në një veprimtari intensive lobuese për tia arritur këtij qëllimi. Lobimi do të vazhdojë deri në pranimin e Kosovës në organizatën më të madhe evropiane”, shkruajti në rrjetet sociale kryeparlamentarja. Kërkesa e Kosovës për t’u anëtarësuar në Këshillin e Europës u miratua me 33 vota pro, nga 31 që duheshin. Ndërsa tashmë do të jetë radha e Asamblesë Parlamentare që do ta shqyrtojë atë.