Me shtimin e fluksit të lëvizjes në fundjavë, kryesisht drejt zonave bregdetare dhe turistike, policia rrugore ka intensifikuar kontrollit në të gjitha akset rrugore me radarë automatikë, makina inteligjente, dronë edukues dhe kamera, me qëllim parandalimin e aksidenteve. Sipas policisë në 48 orët e fundit janë ndëshkuar 2400 shoferë, të cilët kanë shkelur rregullat e qarkullimit rrugor. 645 drejtues janë gjobitur për parakalime të gabuara; 381 për mosvendosje të rripit të sigurimit; 406 për përdorim të aparatit celular gjatë drejtimit të automjetit dhe 173 për mosvendosje të kaskës mbrojtëse teksa drejtonin motora. Po ashtu janë konstatuar me shpejtësi tej normave të lejuara dhe iu është pezulluar leja e drejtimit, 79 drejtuesve nga Rruga e Kombit deri në Sarandë, 25 leje drejtimi iu janë pezulluar drejtuesve nën efektin e alkoolit, ndërsa 6 shoferë të dehur janë arrestuar. Policia thotë se në akset kryesore nacionale ka fluks të shtuar, prandaj këshillohen drejtuesit të përdorin rrugët alternative për të hyrë në Tiranë.